तरुणाचा विषमुक्त शेतीचा भन्नाट प्रयोग ! कांदा लागवड खर्चात बचत व नफ्याची हमी
तरुणाचा विषमुक्त शेतीचा
पुणे: राज्यभरात शेतीचे आधुनिक पद्धतीचे अनेक.वेगवेगळे प्रयोग सुरु आहेत. शेतीत उच्च शिक्षित तरुण आल्यामुळे अनेक शेतीचे नवीन प्रयोग निर्माण होऊ लागले आहेत. असाच एक वेगळा प्रयोग शिरूर तालुक्यातील एका उच्च शिक्षित तरुणाने केला आहे. या शेतीत नावीन्यपूर्ण शेती शेती करत विषमुक्त शेती मलचिंग पेपरवर कांद्याची शेती करण्याचा प्रयत्न केला आहे. त्यामुळे या अनोख्या प्रयोगाची सद्या सोशल मीडियावर चर्चा रंगू लागली आहे. एका सिव्हील इंजिनियरने हा अनोखा प्रयोग केला आहे.
शिरूर तालुक्यातील मांडवगण फराटा या गावातील फराटे कुटुंब आजोबा, पणजोबापासून संपूर्ण कुटुंब पारंपारिक शेती करते. त्यात अक्षय याने सिव्हील इंजिनिअरिंगचे शिक्षण घेतले आहे. मात्र, एवढं शिक्षण असून देखील आपल्या पारंपरिक शेती विषयीचे प्रेम जराही कमी होऊ न देता त्याने मलचिंग पेपरच्या सहाय्याने विष मुक्त शेतीचा प्रयोग केला आहे. त्या उच्च शिक्षित तरुणाचे नाव आहे. अक्षय दादासाहेब फराटे.
याबाबत याविषयी माहिती देताना अक्षय फराटे यांनी सांगितले की, मी पारंपरिक व खर्चिक होणारी शेती व त्यातून होणारे नुकसान टाळण्यासाठी मलचिंग पेपर वर दोन एकरवर कांदा लागवड केली आहे. यासाठी आवश्यक असणारी सर्व मशागत म्हणजे नांगरणी, रोटा व्हेटर, काकरी पाळी करून साडे चार फूट सरी काढण्यात आली. त्यानंतर बेसल डोस, खते बेडवर टाकून बेड सपाट करण्यात आला. त्यानंतर प्रत्येक सरी बेडवर ठिबक ड्रिप करण्यात आले. त्यानंतर मलचिंग पेपरला होल पाडून चार फुटावर मजुरांच्या साहाय्याने लागवड करण्यात आली.
कांदा लागवडीचा खर्च निम्म्यावर येणार
मलचिंग पेपरवर पुढील २० दिवस पाण्याचे नियोजन करण्यात आले असून ड्रीपद्वारे विद्राव्य खते सोडली जाणार आहेत. तसेच चार इंचवर झालेली कांदा लागवड समांतर पद्धतीने करण्यात आल्याने लागवड खर्चात मोठी बचत झाली असून तणनाशक फवारणी केली जाणार नाही. तसेच खुरपणीचा ताण देखील वाचणार आहे. या पद्धतीमुळे इतर कांदा लागवडीला येणाऱ्या खर्चा पेक्षा इतर या कांदा लागवडीत औषधफवारणी, खते यांचा खर्च देखील निम्म्यावर येणार आहे. त्याचप्रमाणे मलचिंग पेपरवर लागवड झाल्याने एकरी १७ ते २० टन कांदा उत्पन्न कमी कालावधीत निघेल अशी अक्षय फराटे यांनी व्यक्त केली आहे.
ठिबकचा वापर केल्यानं पाण्याची बचत
भविष्यात कमी जागेत आणि कमी खर्चात जास्तीत जास्त उत्पन्न मिळविण्यासाठी शेतीत नावीन्यपूर्ण उपक्रम राबविले जाणार असून विषमुक्त शेती करण्यासाठीच आपण आग्रही असल्याचे अक्षयने सांगितले. या अनोख्या प्रयोगामुळे शेतीत पिकांना लागणारी कीड देखील कमी होऊन विषमुक्त शेती करण्यास मदत होणार आहे. या सिव्हील इंजिनिअरच्या डोक्यातील आधुनिक मलचींग पेपरची शेती ही येणाऱ्या काळात अनेक शेतकऱ्यांना चांगला फायदा मिळवून देईल हे निश्चित आहे. त्यामुळे परिसरातील शेतकऱ्यांनी देखील ठिबक व मलचिंग पेपरचा वापर करून पिके घेणे हे काळाची गरज असून तरच शेती फायद्याची करणे महत्त्वाचे ठरणार आहे.
शेतकऱ्यांचा चांगला प्रतिसाद
शिरूर तालुक्यात अशा प्रकारचा पहिलाच प्रयोग असल्याने अनेक बाहेरचे शेतकरी हा शेतीचा प्रयोग पाहण्यासाठी गर्दी करत आहेत. या शेतीची लागवड नेमकी कशी करायची याबाबत मार्गदर्शन घेत आहेत. एका उच्च शिक्षित तरुणाने केलेली ही आधुनिक विषमुक्त मलचिंग पेपर शेती आदर्शवत अशी ठरत असून त्यामुळे नोकरीच्या जास्त मागे न लागता पारंपारिक शेतीला प्राध्यान्य देत अक्षय याने हा भनाट शेतीचा प्रयोग केला आहे. यातून कमी कालावधीत जास्त उत्पन्न मिळणार असल्याचे अक्षय याने सांगितले आहे.
स्रोत : maharashtratimes.com
